Eh!!!! You no wat da kine it almos stay already????? DA KINE!!!!!!!! An not dis kine, or dat kine, or da oddah kine, BUT DA REAL DA KINE KINE!!!!!!! AS IN.....CHRISTMAS????? Well, it stay 2:27 hea in da mornin up at da quarry in Waimanalo, an Christmas is juss right round da corner!!!!!! OR, MAYBE EVEN UNDAH DA CORNER!!!! Who knows??????? Anyways, dis is, of course, Uncle Lolo, whea we always get da low low prices for your intranet kine shopping. I no you stay askin youself, "Self, wondah what Uncle Lolo get dis yea foa da Christmas Tree?" As everyone nos, las year we wen have so many great gifts and ormanents. Da chocolate covered cockaroaches, da BMW hubcap fo put on top da tree, da kahlua pelehu, as in turkey, in one plastic bag, ready for incinerate, da chocolate covered Spam hearts, well, dat was Valentines, so, nevah mind, but still get plenny, so don't be shy on dat one!!!!!! Well, dis year, after having the hole Lolo team go tru xtensive research, we have, dat is me, have come up wit sometin dat is goin make your Christmas Tree da bess evah!!!!! An, what we get??????? POI BALLS COATED WIT PEPPERMINT CANDY!!!!!!!! WHAT COULD BE MORE ONO!!!!!!! Dats right, poi balls, sweet or sour poi, you juss need ask, coated wit beautiful and onoliscious peppermint candy, all da kine white, green an red!!!!!!! How festive, yea!!!!! An, you juss hang em on da tree, day goin make dat tree so special, you no can believe. An, by an by, you juss pick em off da tree, an eat em!!!!!!! Cause da poi goin stay fresh fo at least two monts!!!!! So, ack now, da price is one low low 12 dollah and seven tree eighty for one dozen, dats like aroun 11, or 75 dollah five fifty fo one half dozen, dats like five or so!!!!!! HOW CAN YOU POSSIBLY GO WRONG ON DIS DEAL, I JUSS NEVAH NO!!!! An, we all no you get dose niele nephews an nieces like show up from Kailua, make your life miserable, an you no day goin be cockaroaching dese beautiful ormanents off your Christmas Tree,,,,,,How you goin stop em?????? ONE LECTRIC FENCE!!!!!!! Eh, wat could be more smaht, juss set da fence up around da tree, wen dose niele kolohe kids goin try for grad da ormanents, what day goin get,,,,,ONE SHOCK, AN I DON MEAN SHOCK AS IN SHAKA, AN DAY IS GOIN STAY AWAY FROM YOUR TREE!!!!!!! An, cause is almos da Kine Christmas, I goin trow in da lectric fence for absolutely nuttin!!!! Cept fo 62 dollah seven twenn five for shipping an handling!!!!!!!! So, act now!!!!!!!!!! Uncle Lolo, signing off!!!!!!!
Aloha, hope it brought a minoa'ka, smile
Aloha, hope it brought a minoa'ka, smile
Comment